Enti sema ku tau ajih
Ari di tagang aku begelih
Asoh betikal sekejap aja
Tikal ke ngagai rambau tua menya
Enti mulut peneka nyebut
Ari beganti asuh ku surut
Surut ke tiga puluh taun
Ngambi tua ulih mula ari pun
Sayau sayau seribu sayau
Enda nemu jalai ke panggau libau
Nanya pungga minta pengasih
Dini endur bulih tinchin pengajih
Enti pengingat ulih di tela
Ba talibisin ngasuh nuan meda
Ngambi tua nyamai nengkila
Pengerapat kaul tua kelia
Ingat nuan tua agi mit
Sama enggai pulai mandi ba parit
Tubuh nuan gatal ketup kerengit
Di kaus aku enggau sugu kepit
Sayau sayau seribu sayau
Diatu enda temu dini pendiau
Enti enda pia udah ku lawa
Nyimpul ke kaul tua kelia
Agi ingat ke nuan wai
Tua belangkau atas temanggai
Nuan ngulu ke indai bilai
Aku belalai ba giling tikai
Bisi sekali indai nuan ngangau
Tua belanda rari ke sadau
Nuan telih tebak kerimpak tajau
Di balut aku ngena semakau
Sayau sayau seribu sayau
Petara enda ninga ke kangau
Minta sakang minta penemu
Ti tau ngasuh tua biak baru
Tua merau bekayuh enggau jari
Nuan ngeluan aku ngemudi
Nuan labuh kea ai rari ke buntak
Aku ti ngambi enggau sabak sabak
Kati kala nuan tekenang
Tua berebut mandi ba dulang
Nuan rarauh ngangau ke indai
Tunduk ke aku enggau buah binjai
Sayau sayau seribu sayau
Enda peda manang enggau batu ilau
Enti ulih ngasuh ia nenggau
Semengat tua baruh pun sibau
Ingat nuan maia nya suba
Sebelah tanju tua main buta
Aku engkating ba ujung jungkal
Nuan kekutau ngumbai ku ngakal
Tua bemain ba ujung bilik
Betabur tabur ngena keresik
Nuan empeleman mata enda meda
Di sembur aku enggau pinang muda
Sayau sayau seribu sayau
Enda ulih kangau ngena beliau
Sema ila tua bepansa
Enti ngelala anang enggai nanya
Kati agi ke nuan ingat
Tua belanda ngagai semepat
Nuan tepuruk ba lubang besai
Tarit ku jari iring ku pulai
Sinu ati maia ku ngingat
Agi mit suba tua endang rapat
Diatu nadai kala betemu
Kada enda nuan dah bisi uchu
Sayau sayau seribu sayau
Semampai enda ninga ke biau
Minta gaga minta ia nempa
Ngambi tua biak baka kelia
Sayau sayau seribu sayau
Udah selatan enda serambau
Buji kaul tua dah puntan
Enda salah tua beambu isan
Sayau sayau seribu sayau
Kaul tua suba mina tebasau
Kelia nadai kala beleka
Diatu nadai kala bepeda
Sayau sayau seribu sayau
Petara enda ninga ke kangau
Lirik Lagu Iban: Kaul Tua Kelia - Jeffrey Nyaloi
No comments:
Post a Comment